Ծրագիրը ուղղված է աշակերտների մասնագիտական հետագա կողմնորոշմանը:
Այն առանձնանում է իր ուսումնասիրական խնդիրներով, որի ընթացքում բնօրինակը դառնում է լուրջ ուսումնասիրման օբյեկտ: Բացահայտվում են բնօրինակի կառուցվածքային, ծավալային, գունատոնային օրինաչափությունները, առարկաները վերլուծվում և հարաբերվում են միջավայրի հետ: Ծանոթանում են տարբեր նյութերով աշխատելու տեխնիկաներին և կատարման սկզբունքներին:
Աշակերտները ստանալով կայուն գիտելիքներ գծանկարչության /կառուցվածքային, ծավալային, գծատոնային օրինաչափությունների բացահայտում/, գունանկարչության /գույնի, գունատեսության, գույնի հոգեբանական առանձնահատկությունների ուսուցում/, կոմպոզիցիայի /ռիթմի, մակերեսի, գունա-պատկերա-ծավալային ճիշտ կազմակերպում/ վերաբերյալ, առավել հեշտությամբ կկողմնորոշվեն հետագա` մասնագիտական, առարկայի ճիշտ ընտրության հարցում:
Զուգահեռ գիտելիքներ են տրվում գեղարվեստական մտածողության այլ ձևերի և սկզբունքների վերաբերյալ /իմպրեսիոնիզմ, ֆովիզմ, աբստրակցիոնիզմ և այլն/, որոնք կիրառվում են առաջադրանքներում` ուսումնական ձևերը վերածելով ստեղծագործականի:
Ուսուցումը կատարվում է պարզից բարդ, հիմնական` այբենական, մատչելի ձևերից դեպի մտահայեցողական խորը և գեղարվեստական մտածողության:
Շեշտը դրվում է անհատական աշխատանքի վրա` հաշվի առնելով ուսուցանողների պատրաստվածության տարբեր մակարդակները:
Բազային նկարչություն` գծանկար, գունանկար
Կառուցում և օրինաչափությունների բացահայտում
- գիծ, գծային ռիթմեր` ստատիկ, դինամիկ
- տոն, տոնային անցումներ
- գույն, գունատեսություն
- գունային, տոնային անցումներ
Նատյուրմորտներ
- երկրաչափական մարմիններով
- կենցաղային և խառը առարկաներով
- մրգերով, բանջարեղենով
Կոմպոզիցիա
- կոմպոզիցիոն կառուցվածքներ
- ռիթմեր` գծերով, գույներով, պատկերներով
- գունապլաստիկական հորինվածքներ
- թեմատիկ նկարչություն
Կառուցվածքային արտահայտչամիջոցներ
- համաչափություն և անհամաչափություն
- դինամիկա և ստատիկա
- հեռանկար
- ինտերիեր, էքստերիեր
Ձևաստեղծում
- Տարածական պատկերներ և օբյեկտներ
Գեղարվեստական մտածողության ոճեր և տեխնիկաներ
- Նյութերով ճիշտ աշխատելու սկզբունքներ /մատիտ, ածուխ, պաստել, ջրաներկ, գուաշ և այլն/
- Ոճական փորձարկումներ /վրձնահարվածներով, տպումով, ակտիվ գույներով, հարթապատկերային և այլն/